Ó Sheán Clárach Mac Domhnaill go dtí Nioclás Tóibín: traidisiún na hamhránaíochta ins na Déise

Féachann an tráchtas seo le solas a chaitheamh ar an amhránaíocht mar a chleachtaítí agus mar a chleactaítear fós i gcontae Phort Láirge í. Ardaítear ann ceisteanna a bhaineann le seachadadh agus le sealbhú na n-amhrán I measc an phobail i gceantar na nDéise sa tréimhse c.1750-1960, ó aimsir Sheáin Chláraigh go dtí an ré sin ina raibh Nioclás Tóibín, ‘rí-amhránaí Éireann’, ar bhuaic a réime. Cuirtear spéis anseo i bhfás agus i dteacht chun cinn an Rómánsachais agus (a leathchúpla) an náisiúnachais ar Mhór-roinn na hEorpa in earr an 18ú haois agus amach san 19ú haois; ar thionchar na ngluaiseachtaí sin i bhfad ó bhaile ar Éirinn i gcoitinne san aimsir úd; orthu sin a raibh díolamaí amhrán á gcur in eagar acu in Éirinn san 19ú agus amach san 20ú haois; agus, ar deireadh, ar an stór amhrán mar atá le clos inniu I measc na ndaoine i nGaeltacht na Déise.